ஆனந்த விகடன் வரவேற்பறையில் கற்போம் தளம்

பாராட்டுகளும், அங்கீகாரங்களும் எப்போதும் ஆபத்தானவை. நம்முடைய கடந்த காலத்துக்கு கிடைத்த வெற்றி என்று நாம் நினைத்தாலும், நாம் எதிர்காலத்தில் எப்படி செயல்படுவோம் என்பதை தீர்மானிக்கும் சூழ்நிலையும் உருவாகும். அப்படியான இடத்தில் இருக்கிறேன் நான். 

கற்போம் தளம் குறித்தும், இதழ் குறித்தும் மின்னஞ்சல் மூலமாகவும், அலைபேசி மூலமாவும் நிறைய பேரின் பாராட்டுக்கள் கிடைத்துள்ளது. அவற்றுக்கெல்லாம் மகுடமாக இன்று தமிழத்தில் மிக அதிகம் பேர் வாசிக்கும் வார இதழான ஆனந்த விகடன் வரவேற்பறை பகுதியில் கற்போம் தளம் குறித்த செய்தி வந்துள்ளது. 

06-02-2013 தேதியிட்ட ஆனந்த விகடன் இதழில் (சமந்தா படம் அட்டையில் உள்ள  இதழ் ;-) ) 37 - ஆம் பக்கத்தில் கீழே உள்ள பகுதி இருக்கும். 

தொழில்நுட்பம் கற்போம். www.karpom.com 

ஒவ்வொரு நாளும் நம் கைகளுக்குப் புதிய கணினியும், புதிய அலைபேசியும் வந்து சேர்கிறது. நவீனத் தொழில்நுட்பங்கள் நிறைந்த அந்தக் கருவிகளின் முழுப் பயனையும் நாம் அனுபவிப்பது இல்லை. அவற்றைப் பயன்படுத்திக்கொள்ள எளிமையாகக் கற்றுத்தருகிறது இந்த வலைதளம். ஒரு ஆண்ட்ராய்டு அலைபேசியில் அவசியம் இருக்க வேண்டிய இலவச மென்பொருட்கள் எவையெவை, அவற்றை எங்கிருந்து தரவிறக்கம் செய்யலாம் என்பது முதல், இணைய உலகில் ஒவ்வொரு நாளும் வந்து இறங்கும் புதிய தொழில்நுட்பம் மற்றும் மென்பொருட்கள்பற்றிய அறிமுகமும் உடனுக்குடன் தரப்படுகிறது.  'உங்களிடம் இருந்து ஃபேஸ்புக் எவ்வளவு சம்பாதிக்கிறது?’ என்ற கட்டுரையில், நமது தனிப்பட்ட தகவல்கள் எப்படி கரன்ஸியாக உருமாறுகின்றன என்பதைப் படிக்கும்போது அதிர்ச்சியாக இருக்கிறது!

ஒரு பதிவராக மிகப் பெரிய அங்கீகாரத்துக்கு அந்தரத்தில் மிதந்த நான் இனி நிறைய பேர் கவனிப்பார்கள் என்ற பயம் வந்தவுடன் தானாய் பூமிக்கு வந்துவிட்டேன்.  

கற்போமில் உள்ள ஒவ்வொரு கட்டுரையும் யாரோ ஒருவருக்கு பயன்படும் என்ற எண்ணத்தில் தான் பகிரப்பட்டுள்ளது. ஒவ்வொருவரின் வாசிப்பும், பாராட்டும் தான் இன்று விகடன் வரை கற்போமை கை பிடித்து அழைத்து சென்றுள்ளது. 

விகடனுக்கு நன்றி சொல்லும் அதே வேளையில், இது நாள் வரையில் கற்போமை விமர்சித்த, ஆதரித்த, பாராட்டிய அனைவருக்கும் நன்றி தெரிவித்துக் கொள்கிறேன்.

இந்த பக்கத்தை ஸ்கேன் செய்து அனுப்பிய சேலம் தேவா அண்ணாவுக்கு ஸ்பெஷல் தேங்க்ஸ் :-)

நன்றி !!!

- பிரபு கிருஷ்ணா